चांगभलं प्रतिनिधी | फलटण
सातारा जिल्ह्यातील फलटण तालुक्यातील खामगाव (साखरवाडी) येथे बुधवारी (८ जुलै) सकाळी अत्यंत दुर्दैवी घटना घडली. विजेचा धक्का लागून पारधी समाजातील एकाच कुटुंबातील चार जणांचा जागीच मृत्यू झाला. एकमेकांना वाचविण्याच्या प्रयत्नात ही दुर्घटना घडल्याने परिसरात हळहळ व्यक्त होत आहे.
खामगाव येथील खाजगी इंग्लिश मीडियम शाळेजवळ राहणाऱ्या शिंदे कुटुंबावर अक्षरशः काळाने घाला घातला. प्राथमिक माहितीनुसार, बुधवारी पहाटे साडेपाच ते सहा वाजण्याच्या सुमारास घराबाहेर पडलेल्या विद्युत वायरमध्ये अचानक प्रवाह आल्याने प्रथम सतीश उर्फ पिसुरड्या किसन शिंदे (वय ४८) यांना विजेचा जोरदार धक्का बसला. त्यांना वाचविण्यासाठी त्यांच्या पत्नी गंगू सतीश शिंदे (वय ४०) यांनी धाव घेतली. मात्र त्यांनाही विजेचा धक्का बसला.
यानंतर आई-वडिलांना वाचविण्यासाठी मुलगा सचिन सतीश शिंदे (वय २६) आणि मुलगी आरती सतीश शिंदे (वय २४) हेही पुढे सरसावले. दुर्दैवाने त्यांनाही विजेचा जोरदार धक्का बसला आणि चारही जणांचा घटनास्थळीच मृत्यू झाला.
या घटनेची माहिती मिळताच फलटण ग्रामीण पोलीस ठाण्याचे पोलीस निरीक्षक राजकुमार भुजबळ यांच्या मार्गदर्शनाखाली पोलीस कर्मचारी महादेव पिसे, ओंबासे आणि अडसूळ यांनी तातडीने घटनास्थळी धाव घेतली. पोलिसांनी पंचनामा करून मृतदेह शवविच्छेदनासाठी फलटण उपजिल्हा रुग्णालयात पाठवले आहेत.
या हृदयद्रावक घटनेमुळे खामगाव व साखरवाडी परिसरात शोककळा पसरली असून पारधी समाजावर दुःखाचा डोंगर कोसळला आहे.
मृतांची नावे :
सतीश उर्फ पिसुरड्या किसन शिंदे (वय ४८)
गंगू सतीश शिंदे (वय ४०)
सचिन सतीश शिंदे (वय २६)
आरती सतीश शिंदे (वय २४)
सर्व रा. साखरवाडी, खामगाव, ता. फलटण, जि. सातारा.
घटनेची माहिती मिळताच स्थानिक नागरिकांनी घटनास्थळी धाव घेतली. संबंधित यंत्रणांनी घटनास्थळी भेट देऊन पंचनामा सुरू केला असून, या दुर्घटनेचा अधिक तपास सुरू आहे. प्राथमिक तपासात विजेचा धक्का लागल्याने ही दुर्घटना घडल्याचे समोर आले असून अधिकृत तपासानंतरच नेमके कारण स्पष्ट होणार आहे.
➖➖➖➖➖➖➖
#फलटणक्राईमन्यूज #विजेच्याधक्क्यानेचौघांचामृत्यू #खामगाव
#साखरवाडी #फासेपारधी #चांगभलं #चांगभलंन्यूजपेपर
#चांगभलंन्यूज #साताराजिल्हा #पोलीसन्यूज #क्राईमन्यूज
0 टिप्पण्या