राजवाडा येथील पशुवैद्यकीय दवाखान्याची जागा हस्तांतर करण्यावरून जिल्हा परिषदेत राजकीय रणकंदन ;अखेर आवाजी मतदानाने प्रस्तावाला हिरवा कंदील

हैबत आडके | चांगभलं प्रतिनिधी सातारा

सातारा जिल्हा परिषदेच्या मासिक सर्वसाधारण सभेत शुक्रवारी अनेक विकासकामांचे विषय मंजूर झाले; मात्र संपूर्ण सभेचे लक्ष वेधून घेतले ते राजवाडा येथील पशुवैद्यकीय चिकित्सालयाची जागा सातारा नगरपालिकेकडे हस्तांतरित करण्याच्या प्रस्तावाने. या एका विषयावर सभागृहात जोरदार राजकीय संघर्ष रंगला. सत्ताधारी आणि विरोधी सदस्यांमध्ये आरोप-प्रत्यारोप, तीव्र शब्दयुद्ध आणि आक्रमक भूमिका पाहायला मिळाल्यानंतर अखेर आवाजी मतदानाद्वारे प्रस्तावाला मंजुरी देण्यात आली.

सभेच्या विषयपत्रिकेतील क्रमांक ७ अंतर्गत भवानी पेठेतील सिटी सर्व्हे क्रमांक २७० मधील पशुवैद्यकीय चिकित्सालयाची जागा वाहनतळ उभारण्यासाठी सातारा नगरपालिकेकडे हस्तांतरित करण्याचा प्रस्ताव मांडण्यात आला. शहरातील वाढती वाहतूक कोंडी आणि पार्किंगच्या समस्येवर उपाय म्हणून नगरपालिकेने ही जागा मागितल्याचे प्रशासनाने स्पष्ट केले.

नगरपालिकेने जिल्हा परिषदेला पाठविलेल्या प्रस्तावात विद्यमान इमारतीचे सार्वजनिक बांधकाम विभागाच्या दरसूचीनुसार मूल्यांकन करून सुमारे १ कोटी १२ लाख ७५ हजार २३२ रुपये अदा करण्याची तयारी दर्शविली होती. तसेच पर्यायी व्यवस्था म्हणून गोडोली येथील जिल्हा पशुसंवर्धन कार्यालयाच्या परिसरात समतुल्य नवीन इमारत उभारून देण्याचाही पर्याय प्रस्तावित करण्यात आला होता.
मात्र या प्रस्तावावर पशुसंवर्धन विभागाने सादर केलेल्या अहवालाने चर्चेला वेगळेच वळण दिले. अहवालानुसार १९४४ पासून सुरू असलेले राजवाडा पशुवैद्यकीय चिकित्सालय आजही नियमितपणे कार्यरत असून येथे दरमहा सरासरी १,५१६ जनावरांवर उपचार केले जातात. सातारा शहरासह परिसरातील ११ गावांतील पशुपालक या दवाखान्याच्या सेवांवर अवलंबून असल्याने ही सुविधा कायम ठेवणे आवश्यक असल्याचे विभागाने नमूद केले.
याच मुद्द्यावरून स्वाभिमानी शेतकरी संघटनेचे नागठाणे गटाचे सदस्य राजू शेळके यांनी प्रशासनावर जोरदार टीका केली. सार्वजनिक मालमत्ता दुसऱ्या संस्थेकडे हस्तांतरित करण्यापूर्वी संपूर्ण मालमत्तेचे लेखापरीक्षण व्हावे, तसेच जागा द्यायची असल्यास ती भाडेतत्त्वावर देण्याचा पर्याय विचारात घ्यावा, अशी मागणी त्यांनी केली. ग्रामीण भागातील पशुपालकांच्या हिताचा विचार न करता घेतला जाणारा निर्णय स्वीकारार्ह नसल्याचे त्यांनी स्पष्ट केले.
या आक्षेपांना उत्तर देताना जिल्हा परिषदेचे उपाध्यक्ष राजू भोसले यांनी संबंधित जागा ही जिल्हा परिषदेची नव्हे तर शासनाची मालमत्ता असल्याचे सांगितले. शासनाच्या मंजुरीनुसार व अटी-शर्तींच्या अधीन राहूनच हस्तांतरणाची प्रक्रिया राबविली जात असल्याचे त्यांनी सभागृहात स्पष्ट केले.
उपाध्यक्षांच्या स्पष्टीकरणानंतरही विरोधकांचा आक्रमक सूर कायम राहिला. पशुवैद्यकीय सेवा भविष्यात कुठे उपलब्ध होणार, सार्वजनिक मालमत्तेच्या हस्तांतरणात पारदर्शकता कितपत पाळली जात आहे आणि पर्यायी सुविधा प्रत्यक्षात कधी उभारल्या जाणार, असे अनेक प्रश्न सदस्यांनी उपस्थित केले. त्यामुळे जवळपास अर्धा तास सभागृहात तीव्र शाब्दिक चकमक सुरू राहिली. काही वेळा तर एकाच वेळी अनेक सदस्य बोलू लागल्याने गोंधळाचे वातावरण निर्माण झाले आणि अध्यक्षा डॉ. प्रिया शिंदे यांना वारंवार हस्तक्षेप करावा लागला.

दीर्घ चर्चेनंतर अध्यक्षा डॉ. प्रिया शिंदे यांनी हा विषय आवाजी मतदानासाठी ठेवला. बहुमताने प्रस्ताव मंजूर झाल्याचे त्यांनी जाहीर केले. त्यामुळे भवानी पेठ येथील पशुवैद्यकीय चिकित्सालयाची जागा वाहनतळासाठी सातारा नगरपालिकेकडे हस्तांतरित करण्याचा मार्ग अधिकृतपणे मोकळा झाला.
या निर्णयानंतर समर्थक सदस्यांनी शहरातील पार्किंगच्या वाढत्या समस्येवर हा महत्त्वाचा उपाय ठरणार असल्याचा दावा केला; तर विरोधकांनी पशुवैद्यकीय सेवांवर परिणाम होण्याची शक्यता व्यक्त करत सार्वजनिक मालमत्तेच्या हस्तांतरणासाठी अधिक पारदर्शक आणि सर्वसमावेशक प्रक्रिया राबविण्याची मागणी कायम ठेवली.
राजकीय रंग चढलेल्या या चर्चेमुळे जिल्हा परिषदेच्या मासिक सभेतील हा विषय दिवसातील सर्वाधिक चर्चेचा ठरला.

➖➖➖➖➖➖➖➖
Keywords
Satara Zilla Parishad Meeting
Satara ZP General Body Meeting
Rajwada Veterinary Hospital
Veterinary Hospital Land Transfer
Satara Municipality Parking Project
Satara Political News
Raju Shelke
Raju Bhosale
Dr Priya Shinde
Satara District News
Satara ZP Latest News
Maharashtra Local Politics
#Satara #SataraNews #ZillaParishad #SataraZP #PoliticalNews #MaharashtraNews #Rajwada #VeterinaryHospital #ParkingProject #RajuShelke #RajuBhosale #DrPriyaShinde #LocalPolitics #ChangbhalaNews #BreakingNews #चांगभलं #चांगभलंन्यूजपेपर
#साप्ताहिकचांगभलं #चांगभलंसाप्ताहिक