 |
| AI Image |
मुंबई, दि. १५ | चांगभलं वृत्तसेवा
कोरोना महामारीनंतर देशात आणि राज्यात संसर्गजन्य आजारांविषयी वाढलेली सतर्कता लक्षात घेता, आता जपानी मेंदूज्वर (Japanese Encephalitis) या गंभीर आजाराविरोधात महाराष्ट्र सरकार सज्ज झाले आहे. या पार्श्वभूमीवर राज्यात प्रतिबंधात्मक उपाययोजना, व्यापक लसीकरण आणि जनजागृती यावर विशेष भर देण्यात येत आहे.
लसीकरण वाढवा, नागरिकांचे आरोग्य सुरक्षित ठेवा – मुख्यमंत्री
राज्याचे मुख्यमंत्री देवेंद्र फडणवीस यांनी दिलेल्या माहितीनुसार, जपानी मेंदूज्वरावर नियंत्रण मिळवण्यासाठी राज्य शासनाने लसीकरण मोहिमेला वेग दिला असून आरोग्य यंत्रणांना सतर्कतेचे निर्देश देण्यात आले आहेत.
जपानी मेंदूज्वर – धोकादायक संसर्ग...
जपानी मेंदूज्वर हा डासांद्वारे पसरणारा गंभीर आजार असून तो थेट मेंदूवर परिणाम करतो. या आजारामुळे रुग्णांना झटके येणे, मेंदूची सूज, तसेच मृत्यू होण्याचा धोका असतो. विशेष म्हणजे, वाचलेल्या रुग्णांमध्ये दीर्घकालीन न्यूरोलॉजिकल समस्या निर्माण होऊ शकतात.
राज्यातील स्थिती नियंत्रणात, पण धोका कायम....
२०२१ ते मार्च २०२६ या कालावधीत राज्यातील रुग्णसंख्या कमी असली तरी काही जिल्ह्यांमध्ये रुग्ण आढळले आहेत.
२०२२ : २ रुग्ण
२०२३ : ५ रुग्ण
२०२४ : ५ रुग्ण, २ मृत्यू
२०२५ : ७ रुग्ण, १ मृत्यू
२०२६ (मार्चपर्यंत) : एकही रुग्ण नाही
नागपूर, भंडारा, चंद्रपूर आणि गडचिरोली या विदर्भातील जिल्ह्यांमध्ये प्रामुख्याने प्रकरणे नोंदवली गेली आहेत.
लसीकरण मोहिमेत मोठी प्रगती....
एप्रिल २०२५ ते फेब्रुवारी २०२६ दरम्यान लसीकरण मोहिमेत राज्याने उल्लेखनीय कामगिरी केली आहे.
पहिला डोस : ८९.२६%
दुसरा डोस : ७८.६८%
धाराशिव, लातूर आणि सोलापूर जिल्ह्यांनी उत्कृष्ट कामगिरी केली असताना, रायगड, पुणे व पीसीएमसी भागात दुसऱ्या डोसचे प्रमाण तुलनेने कमी आहे.
उपचार आणि निदान सुविधा उपलब्ध...
राज्यात नागपूर, गडचिरोली, सेवाग्राम (वर्धा), भंडारा आणि गोंदिया येथे निदानासाठी सेंटीनेल केंद्रे कार्यरत आहेत. तसेच १६ जिल्ह्यांमध्ये बाल अतिदक्षता विभाग (PICU) सुरू असून उपचारांची सुविधा उपलब्ध आहे.
विदर्भ सर्वाधिक संवेदनशील....
आरोग्य विभागाच्या माहितीनुसार विदर्भ हा भाग जपानी मेंदूज्वरासाठी सर्वाधिक धोकादायक आहे. ग्रामीण भागातील डासांची वाढ, तसेच डुक्कर व पक्ष्यांच्या संपर्कामुळे संसर्गाचा धोका वाढतो.
नियंत्रणासाठी उपाययोजना....
राज्यात पुढील उपाययोजना राबविण्यात येत आहेत :
नियमित व विशेष लसीकरण मोहिमा
डास नियंत्रणासाठी फवारणी
क्यूलेक्स डासांचे सर्वेक्षण
गप्पी मासे सोडणे
स्वच्छता व जनजागृती मोहीम
नागरिकांना आरोग्य विभागाचे आवाहन....
लहान मुलांसाठी हा आजार अधिक धोकादायक असल्याने पालकांनी लसीकरण करून घ्यावे. ताप, डोकेदुखी किंवा मेंदूशी संबंधित लक्षणे दिसल्यास तात्काळ डॉक्टरांचा सल्ला घ्यावा, असे आवाहन आरोग्य विभागाने केले आहे.
➖➖➖➖➖➖➖➖➖➖➖➖➖➖➖
#JapaneseEncephalitis #BrakingNews
#Maharashtra #Health #जपानीमेंदूज्वर
#चांगभलंन्यूज #ChangbhalaNews
0 टिप्पण्या