"पर्यावरण रक्षण"चा संदेश देत कराड सायकल क्लबची पंढरपूर सायकल वारी

 

५१ सायकलिस्टांचा १४३ किमी प्रवास; राज्यस्तरीय सायकल संमेलन, प्रदक्षिणा व सायकल रिंगणात

हैबत आडके | चांगभलं प्रतिनिधी कराड
"होय होय वारकरी, पाहे पाहे रे पंढरी..." या भक्तिभावाने कराड सायकल क्लबतर्फे आयोजित श्रीक्षेत्र पंढरपूर सायकल वारी उत्साहात पार पडली. या वारीत पाच बाल सायकलिस्टांसह एकूण ५१ सायकलिस्ट सहभागी झाले होते.

शनिवार, ११ जुलै रोजी पहाटे चार वाजता कराड येथून सायकल वारीचे प्रस्थान झाले. कराड–शामगाव घाट–मायणी–दिघंची मार्गे सुमारे १४३ किलोमीटरचा आठ ते नऊ तासांचा प्रवास पूर्ण करून दुपारी दोन वाजता सायकलिस्ट श्रीक्षेत्र पंढरपूर येथे दाखल झाले. वर्दीश विजय लिगाडे, अवनीश मयूर माने, शौर्य क्षितिज बेलापुरे, अनुष्का रणजित धारवट व संहिता समीर करमरकर या बाल सायकलिस्टांसह डॉ. माणिक बनकर, प्राचार्य डॉ. सतीश घाटगे, सुनील बुधे, विनोद सावंत, अभय नांगरे, विजय मोहिते, राजू रेके, अनिल कुलकर्णी, डॉ. राहुल फासे, डॉ. संतोष टकले यांच्यासह अन्य सायकलिस्ट सहभागी झाले.

नाशिक सायकलिस्ट क्लब व पंढरपूर सायकल क्लब आयोजित राज्यस्तरीय पाचव्या सायकल संमेलनात राज्यातील १३२ सायकल क्लब सहभागी झाले होते. रविवारी सकाळी सायकल प्रदक्षिणा, रेल्वे मैदानावरील भव्य सायकल रिंगण आणि हरिनामाच्या गजरात सर्वांनी सहभाग नोंदविला. त्यानंतर संमेलनात सहभागी होऊन सायकलिस्ट कराडकडे रवाना झाले.

प्रतिकूल परिस्थितीत १४ जणांची रिटर्न सायकल वारी...

पंढरपूरहून कराडकडे प्रचंड ऊन आणि जोरदार हेडविंडचा सामना करत जय पोद्दार, वेदांत रावळ, मनोज कुलकर्णी, प्रा. ज्ञानेश्वर भोईटे, प्रा. सदाशिव आवळेकर, डॉ. माणिक बनकर, प्राचार्य डॉ. सतीश घाटगे, सुनील बुधे, अभय नांगरे, डबल एसआर रविराज जाधव, मुकुंद पोद्दार, प्रा. अर्जुन भिंगारे, वैभव गुरसाळे आणि चंद्रजीत पाटील या १४ सायकलिस्टांनी रिटर्न सायकल वारी पूर्ण करत जिद्द, चिकाटी आणि शारीरिक क्षमतेचा प्रेरणादायी आदर्श घालून दिला.

➖➖➖➖➖➖➖

#सायकलवारी #कराडसायकलक्लब #पंढरपूरवारी #आषाढीवारी

#आषाढीवारी2026 #चांगभलं #चांगभलंन्यूजपेपर

#चांगभलंन्यूज #साप्ताहिकचांगभलं #चांगभलंसाप्ताहिक