आंतरराष्ट्रीय घुबड जागरूकता दिन : जखमी मासेमार घुबडावर यशस्वी उपचार; तीन आठवड्यांनंतर पुन्हा जंगलात भरारी

 

चांगभलं प्रतिनिधी | कराड | ४ ऑगस्ट २०२६
आंतरराष्ट्रीय घुबड जागरूकता दिनानिमित्त वन्यजीव संवर्धनाचे महत्त्व अधोरेखित करणारी एक प्रेरणादायी घटना समोर आली आहे. शेतामध्ये जखमी अवस्थेत आढळलेल्या ब्राऊन फिश आऊल (मासेमार घुबड) या पिल्लावर यशस्वी उपचार करून त्याला पुन्हा नैसर्गिक अधिवासात मुक्त करण्यात आले. तीन आठवड्यांच्या उपचारानंतर हे घुबड पूर्णपणे बरे झाल्याने संध्याकाळच्या वेळी त्याची यशस्वी पुनर्मुक्ती करण्यात आली.

मिळालेल्या माहितीनुसार, हे घुबडाचे पिल्लू शेतात जखमी अवस्थेत आढळून आले होते. ते पूर्णपणे सावध, सक्रिय आणि आक्रमक असले तरी डाव्या पायावर उभे राहू शकत नव्हते. प्राथमिक तपासणीत ते घरट्याच्या झाडावरून खाली पडल्याचा संशय व्यक्त करण्यात आला.
तपासणीदरम्यान बाह्य स्वरूपाच्या कोणत्याही गंभीर जखमा आढळल्या नाहीत. मात्र, एक्स-रेमध्ये डाव्या पायाच्या टिबिया-फिब्युला हाडाला मध्यभागी फ्रॅक्चर असल्याचे स्पष्ट झाले. त्यानंतर पायाला स्प्लिंट आणि प्लास्टर स्लॅब लावून स्थिर करण्यात आले. हालचाल कमी राहावी यासाठी घुबडाला सुरक्षित लहान टोपलीत ठेवण्यात आले.
उपचारादरम्यान वेदनाशामक औषधे, मल्टिव्हिटॅमिन्स आणि कॅल्शियम देण्यात आले. दररोज ताजे हाडविरहित चिकन आणि गोड्या पाण्यातील मासे खाऊ घालण्यात आले. उष्णतेचा त्रास होऊ नये म्हणून त्याला वारंवार पाणी देण्यात आले तसेच थंड आणि सावलीच्या ठिकाणी ठेवून सातत्याने त्याची निगा राखण्यात आली.
सुमारे तीन आठवड्यांच्या उपचारानंतर घुबडाचे फ्रॅक्चर पूर्णपणे भरून आले. स्प्लिंट काढल्यानंतर ते पूर्ववत चालू लागले, उड्या मारू लागले आणि त्याचे नैसर्गिक निशाचर वर्तनही दिसून आले. त्यामुळे ते पुन्हा जंगलात सोडण्यासाठी सक्षम असल्याचे निश्चित करण्यात आले.
यानंतर ज्या नदीकाठी हे घुबड बचावण्यात आले होते, त्याच परिसरात संध्याकाळच्या वेळी त्याला मुक्त करण्यात आले. भरारी घेत त्याने नदी पार केली आणि नैसर्गिक अधिवासात विलीन झाले. वन्यजीव संवर्धनाच्या दृष्टीने ही पुनर्मुक्ती अत्यंत महत्त्वाची मानली जात आहे.

घुबडांच्या संवर्धनासाठी जागरूक राहणे काळाची गरज..
"घुबडे ही निसर्गातील परिसंस्थेचा अत्यंत महत्त्वाचा घटक आहेत. उंदरांची संख्या नैसर्गिकरीत्या नियंत्रणात ठेवून ती शेतीचे संरक्षण करतात आणि पर्यावरणाचा समतोल राखण्यात मोलाची भूमिका बजावतात. आंतरराष्ट्रीय घुबड जागरूकता दिनानिमित्त प्रत्येकाने त्यांच्या संवर्धनासाठी जागरूक राहणे ही काळाची गरज आहे,"
--- रोहन भाटे शहा
मानद वन्यजीव रक्षक, सातारा.

➖➖➖➖➖➖

#घुबड #घुबडजागरूकतादिवस #वन्यजीव #पर्यावरण 

#महाराष्ट्र #सातारा #कराड #आंतरराष्ट्रीयघुबडदिवस

#चांगभलंन्यूजपेपर #साप्ताहिकचांगभलं