🐾निसर्गाशी मैत्री, वन्यजीव संवर्धनाची नवी दिशा!

 🐾बीएनएचएसच्या नेचर क्लब उपक्रमातून कराड-पाटणमधील विद्यार्थ्यांना निसर्ग शिक्षण

चांगभलं प्रतिनिधी | कराड

पश्चिम घाट हा जैवविविधतेने समृद्ध असलेला निसर्गाचा अमूल्य वारसा आहे. सह्याद्रीची जंगले, नद्या, विविध वनस्पती आणि वन्यजीव यांचे संरक्षण करणे ही काळाची गरज आहे. वाढते जंगलक्षेत्रावरील अतिक्रमण, अधिवासाचा ऱ्हास, वन्यजीवांची तस्करी आणि मानव-वन्यजीव संघर्ष यांसारख्या समस्यांवर मात करण्यासाठी समाजात निसर्ग संवर्धनाविषयी जागरूकता निर्माण होणे आवश्यक आहे.

याच उद्देशाने बॉम्बे नॅचरल हिस्ट्री सोसायटी (BNHS) भारतातील अग्रगण्य हया १४३ वर्ष जुनी संस्था व क्रिएटिव्ह नेचर फ्रेंड्स कराड तर्फे कराड आणि पाटण तालुक्यांतील शाळांसाठी ‘नेचर क्लब’ उपक्रम सुरू करण्यात आला आहे. या उपक्रमात सुमारे ४० शाळांनी सहभाग घेतला आहे. विद्यार्थ्यांमध्ये निसर्ग, पर्यावरण आणि वन्यजीवांविषयी प्रेम व संवेदनशीलता निर्माण करण्याच्या दृष्टीने हा उपक्रम महत्त्वपूर्ण आहे.

विद्यार्थ्यांना पक्षीनिरीक्षण, निसर्गभ्रमंती, स्थानिक जैवविविधतेची ओळख आणि वन्यजीवांच्या अधिवासाचे महत्त्व अशा विविध माध्यमांतून निसर्गाचा प्रत्यक्ष अनुभव घेता येईल. लहान वयातच निसर्गाची ओळख झाल्यास भविष्यात जबाबदार नागरिक आणि संवर्धक घडण्यास मदत होते.

सह्याद्री व्याघ्र प्रकल्प, कोयना अभयारण्य आणि चांदोली राष्ट्रीय उद्यानाचा परिसर हा विविध वन्यजीवांचा महत्त्वाचा अधिवास आहे. या जंगलांमुळे जलस्रोतांचे संरक्षण, पर्यावरणाचा समतोल आणि जैवविविधतेचे संवर्धन होते. त्यामुळे वनांचे संरक्षण म्हणजे आपल्या भविष्यातील पाणी, पर्यावरण आणि नैसर्गिक संपत्तीचे संरक्षण होय.

गेल्या ३० वर्षांपासून पश्चिम घाट आणि सह्याद्री परिसरात वन्यजीव संवर्धन, वन्यजीव गुन्ह्यांना प्रतिबंध, वन्यप्राणी बचाव व पुनर्वसन आणि निसर्ग शिक्षणाच्या क्षेत्रात काम करताना विद्यार्थ्यांमध्ये जागरूकता निर्माण करण्याचे महत्त्व प्रकर्षाने जाणवले आहे.

वन्यजीव संवर्धन केवळ वन विभागाची जबाबदारी नाही...

वन्यजीव संवर्धन ही केवळ वन विभागाची जबाबदारी नसून, ती प्रत्येक नागरिकाची सामूहिक जबाबदारी आहे. बीएनएचएसच्या नेचर क्लबमध्ये सहभागी झालेल्या शाळांमधील विद्यार्थी निसर्ग संवर्धनाचे दूत बनून हा संदेश समाजापर्यंत पोहोचवतील, अशी अपेक्षा आहे.

“निसर्गाशी मैत्री करूया, वन्यजीवांचे अस्तित्व जपूया आणि भावी पिढ्यांसाठी समृद्ध सह्याद्रीचा वारसा सुरक्षित ठेवूया!”
- रोहन भाटे –
मानद वन्यजीव रक्षक, महाराष्ट्र वन विभाग, सातारा

➖➖➖➖➖➖➖

#वन्यजीवसंवर्धन #वनविभाग #बीएनएचएस #नेचरक्लब #निसर्गशिक्षण #सातारा #चांगभलंन्यूजपेपर #ChangbhalaNews