कराड दक्षिणमधील १३५ भजनी मंडळांना ३३.७५ लाखांचे अनुदान मंजूर

 आ.डॉ. अतुलबाबा भोसले यांचे विशेष प्रयत्न; भजनी मंडळांच्या खात्यावर लवकरच रक्कम होणार वर्ग

कराड प्रतिनिधी |चांगभलं वृत्तसेवा

भारतीय जनता पार्टीचे जिल्हाध्यक्ष तथा कराड दक्षिणचे आमदार डॉ. अतुलबाबा भोसले यांच्या विशेष प्रयत्नांमुळे कराड दक्षिणमधील तब्बल १३५ भजनी मंडळांना प्रत्येकी २५ हजार रुपयांप्रमाणे एकूण ३३ लाख ७५ हजार रुपयांचे अनुदान मंजूर झाले आहे. राज्याज्या सांस्कृतिक कार्य विभागाच्या माध्यमातून अनुदानाची रक्कम लवकरच भजनी मंडळांच्या खात्यावर वर्ग केली जाणार आहे.

महाराष्ट्राच्या सांस्कृतिक कार्य विभागाकडून सांस्कृतिक क्षेत्रात काम करणाऱ्या संस्थांना अनुदान दिले जाते. भाजपा-महायुती सरकारने गणेशोत्सवाला महाराष्ट्राचा राज्य महोत्सव म्हणून दर्जा देण्यात आला आहे. याअंतर्गत भजनी मंडळांना भजन साहित्य खरेदीसाठी २५ हजार रुपयांचे अनुदान देण्याची घोषणा सांस्कृतिक कार्य मंत्री ॲड. आशिष शेलार यांनी केली होती.

त्यानुसार कराड दक्षिणमधील जास्तीत जास्त भजनी मंडळांना या अनुदानाचा लाभ मिळावा, यासाठी आमदार डॉ. अतुलबाबा भोसले यांनी विशेष मोहिम राबवित भजनी मंडळांच्या ऑनलाईन नोंदणीसाठी प्रयत्न केले. या माध्यमातून नोंदविण्यात आलेल्या कराड दक्षिणमधील तब्बल १३५ भजनी मंडळांना प्रत्येकी २५ हजार रुपयांप्रमाणे एकूण ३३ लाख ७५ हजार रुपयांचे अनुदान मंजूर झाले आहे. लाभार्थी भजनी मंडळांच्या खात्यामध्ये ही रक्कम लवकरच जमा होणार असल्याची माहिती प्रशासनाकडून देण्यात आली आहे.

या अनुदानामुळे भजनी मंडळांना आवश्यक साहित्य खरेदीस मोठी मदत होणार असून, ग्रामीण भागातील सांस्कृतिक परंपरा आणि वारकरी संप्रदायाची परंपरा अधिक बळकट होण्यास हातभार लागणार आहे. या निर्णयाबद्दल कराड दक्षिणमधील सर्व भजनी मंडळांच्यावतीने आमदार डॉ. अतुलबाबा भोसले यांचे आभार व्यक्त केले जात आहेत.